Håhåååj!

Buoris uddni.

17 biejve vil studænntaj! Gålmmå skåvllåjage li juo vássám. Våjvååj,na  majt dal??

Vuostasj bále muv iellemin gå iv diede majt dahkat gå tjaktja boahtá. Gå iv la juo mierredam majt galgav dahkat.
Gå nuorajskåvlåv ålli, de diedá ahte viertti válljit joarkkaskåvlåv. Valla dálla la friddja dahkat jur majt sidá. Joarkket allaskåvlåjn, barggat, ræjssut jali ietjá.
Navti le sihkarit ållessjattugijn sjaddat. Iesj diehtet ja mierredit.

Mån lav åhtsåm guokta universitehtajda, valla dåbdåv ahte iv riek ájn sidá studerigoahtet. Sjattav barggat juonná, la gåjt pládna. Guhkahav Vuodnaj. Valla gånnå barggat iv diede. Doajvov måj Per Mathisijn sjaddin sæmmi bájken gåjt J

Dálla ietjá ássjáj.

Ævtásj rájes le boahtám galle artihkkala median da biledimij birra mij dahpaduvvin Jåhkåmåhke márnánin 2011. Guokta næjtso bileduvvin åvtå báhtjas Guovddogæjnos ja akta Kárásjjågås. Næjtso ettjin dåbdå nubbe nubbáj.
Median tjuodtju ahte facebookan gávnnu juohkus ulmutjijda guhti doarjodi dáv báhtjav Kárásjjågås. Ulmutjijda guhti jáhkki báhtjajda, guhti vuornodibá biledimev.

Dán juohkusin li sebrulattja d.d. polijsa, politihkkára ja journalista. Almulasj ulmutja doarjodi biledimbáhtjajda.

Dåbdåv måjdås. Báhtja li GUOKTE duobbmidallám duobbmoståvlås. Ij la dat nuoges vuosedit ahte såj libá siválattja?
Sábmen le læhkám ahte ij dákkár ássjij birra sáhkadit, ja diehttelis viertti jáhkket fuolkkáj ja nav...

Usjudaláv næjtsojda gå dát ássje ij guossak hiejte. Ja væráp le vuojnnet ahte æbá jáhkeduvá muhtemijs. Jáhkáv muhtemijda le ájgge válldes ierijt tjalmmetjadnasav!

Næjtso oadtjoba ålles muv doarjov. Ja ienemusoasse ietjá ulmutjijs.

Mijá Tjierrekluokta

Tjåhkkåhiv facebookan gæhttjamin Berit ibme gåvåjt gieses 2010. Gåvå tjierrekluovtas.
Mijá párádijssa.
Guhkahav gæssáj desik bessav vas Luoktaj vuolgget.

Gáppte

Åvdep ájllega lidjiv Rachela vega lunna goarromin. Ållijiv gáptijn, ja sjaddiv riek dudálasj dajna. sjaddá hærmmat suohtas dav adnet bálan/studentan! Ieddne l avev snjissjkum ja la låhtågoahtám vuoddagijt ja aj sliehpáv goarromin. Tjiehpes æddnám :)



Ållo gijtto Rachelij buorre viehke åvdås!!

Åvdep lávvodagá lij muv riegádumbiejvve. Hávsskes biejvve lij, ja vil gáhkov oadtjiv! (Måj PMajn báhkkujma aktan)
Lij riek njálgge. Ja mielke dagá.

Idet vuolgáv Fossbakkeni. Hávsskes ájllek vuorddá :)

Buoris vas!

Mån lav nav nievrre sjaddam dánna tjállet!
Huomahiv gå lidjiv Naima bloggan låhkåmin ahte mån vierttiv ienebuv tjállegoahtet.

Nav suohtas suv bloggav tjuovvot gå dat la dåssju sámegiellaj tjálledum. Lidjiv sihtat ienep sámebloggajt låhkåt!

Gå mujna ij la vil sámegiella skåvlån la ájn ájnnasabbo dánna tjálláv. Adnet gielav le nav ájnas gå sámegiella la árvulasj giella. Mån sidáv gielav vaddet muv mánájda, ja sidáv muv áhkkova (riekta?) galggi gielav oadtjot.
Suddo gå ittjiv sámegielajn oadtjuv joarkket skåvlån. Dálla ij la nuoges ájgge vil skåvlås. Dåssju 6 váhko, ja iv háhppida dajt 60 tijmajt adnet dan ájgen. Mujna l ållo ietjá bargo aj ma vierttiji gærggat.

Biejav gåvåv dálvveloabes gå lijma Åren.

Muohtatjalmme

Lav skåvlån dálla. Hæjttám, valla galgav dánna barggat nielje rádjáj. Sijdan agev ietjá bargojt gávnav. Duola dagu rádjat, bládijt låhkåt ja másjijnan surffit. Dánna skåvlån aj dåssju másjijnan tjåhkkåhav, facebookan, Freecell spelav ja musihkav gulldalav. Valla muhttijn båttåtjav váldáv ja skåvllåbargojn bargav ;)

Ájllegin lav Josefijna lunna Jielleváren årrum. Buorre ja hávsskes ájllek. Lin skoterav vuoddjám, tjuojggam, stádan vádtsám, filmajt gæhttjam (oadám madin filmav gæhttjam), vuoptajt bájnnum ja aj slåppåjt stiellim.

Biejav muhtem gåvåjt åvdep ájllegis.

Maŋŋela galgav caféaj Per Jonasijn. Fijkkit ja ságastit.

Vijmak Gierunin!

Buoris gájka!

Lav ierijt læhkám guokta vahko, valla dálla lav ræjsos ållim. Gierunin, ja skåvllå le vas álggám.
Snåsan, Åren, Valsjöbyn ja Ubmemin lin måj Per Mathisijn årrum.
Gal le riek suohtas læhkám! Valla dálla lin vájbbam,

Sáme vahkkon Ubmemin lijma dáv ájllega. Årojma buorre rádna lunna, Evelina.
Mij lip graffitiv mállim, ja sisbandyav spellam. Ållo ulmutjijt iejvvim, ja konsertajt gulldalam.

Åjllastit, mij la suohtastallat ubmesámegiellaj :)

Manon

Buorre iehket!

Lávvodagá rájes lav duok diek mannam. Per Mathis muv lusi bådij bierjedagá. Vuolgijma Bårjåsij lávvodagá Rachela vega lusi. Álu nav hávsske danna årrot. Dagu sijddaj boahtet.:)
Sådnåbiejve vattijma vas Gierunij páhkkitjit, ja Fossbakkenij jåvsådijma iehkedappon.
Dat lij vuostasjbále Fossbakkenin munji. Riek suohtas ja diehttelis riek geldulasj. Iv lim guossak iejvvim suv æjgádijt, valla jáhkáv manáj buoragit. Hávsske gæhttjat Per Mathisa sijddabájkev ja gånnå sån le bajássjaddam.
Uddni (dijstagá) manájma Narvijkaj bijlav viettjatjit. PM la ruopsis Toyota Corollav oasstám, dåhkkij dat!
Bådijma dieki Stuorgæddáj áhtje ja Inger-Lise lusi biel vidá bájken. Buorre sunnu vuojnnet.
Idet vas vaddin oarjás, Snåsaj. Suohtas manon liehket.

Dálla vierttijin oaddátjit navti ahte nahkin árrat idedis smaredit.

Buorre idja!

Buorre idet!

Tjáppa biejvve uddni!

Almme l alek, ij la åvvå balvva. Biejvve bájttá ja ruvva l vinndegav jåvsådam. Vuogas.

Galgav skåvllåbargujn barggagoahtet.

Vuojnnalin

Dav biejvev

Buoris gájka vas!

Lav ierijt læhkám mælggadav dálla, valla ållo suohttasa li dáhpaduvvam dáv maŋemus vahkov.

Lidjiv Julevsáme giella konferánsan Jåhkåmåhken duorastagá ja bierjjedagá åvdep vahko. Lej riek miellagiddevasj lågådallamijt gulldalit, iejvvit ulmutjijt, ságastallat ájnas ássjij birra ja buoremus GULLAT ja SÁHKADIT Julevsámegielav!! Riek dudálasj lav konferánsajn, ja ávon lav at vuojnáv doajvvo la aj boahtteájggáj.

Lidjiv Bårjåsin Rachela ja Per-Erica vega lunna ålles ájllegav. Gårrum gáptev, ja lav dudálasj majt dálátjit lav gårrum. Sase buddasij lav ållim, ja åhtsåj álggám. Gássjel lij mierredit makkir bájnojt válljit, valla sjaddá unnán ietjá gå dábálasj.

Sæmmibále gå lav ávon, de lav oadtjum nievre ådåsav. Uddni oadtjuv diehtet ahte skåvllåoajvve ij vatte munji ienep sámegiel'tijmajt. Lav juo gærggam Sámegiella A:ajn, ja måj Rachelijn lin juo álggám B kursajn. Valla skåvllåoajvve ganugasstá munnu.

La stuorra hådjånibme munji.
Sámegiella status ja dille skåvlån Svierigin ij la buorre. Mån lav sámegielav jagev ja 3-4 máno dálla låhkåm, suláj 2 tijma vahkkuj. 2 TIJMA vahkkuj? Mij la dat??

80 tijma galggin bielnupjahkáj . Valla måj Rachelijn lin juo gærggam daj tijmaj. Na majt dal? Mujna l riektá iednegiella åhpadusáv adnet joarkkaskåvlån, Svierigin aj. Iv riekta dádjada manen sij máhtti javllat munji at iv oattjo ienebuv? Manen?

Árvvedav le ruhta diehti. Ja gå la dåssju akta oahppe, skåvllå ij la dudálasj. Valla mån vádtsáv skåvlåv. Skåvllå la dakkár gånnå galga oahppat. Gånnå åhpadi ja fáladi åhpadimev.
Mujna l riektá

Dåbddu harmmat vájvve.. Valla doajvov ja jáhkáv oattjov joarkket sámegielajn.

Buorre biejvve

Birrusin 13 galmmagráda uddni. Unnán biekkasj, valla ietján buor’ dálkke. Biejvve l várij badjel guovlastam. Galggiv jus riekta dieváj mannat tjerastittjat, valla ij la miella dasi..

Iektu Sanne-Ristin riŋŋguj. Márkkána birra sáhkadijma ja ietjá suohttasav. Ávvudaláv! Sanne-Ristin le buorre ráddna.

Gårruv ålles biejvev iektu. Akta nuvtagijn gærggiv, ja nuppijn uddni gergav. Dåbddu buorre ja lav riek dudálasj daj. Suohtas J Sidáv sijddaj vádtset dal ja goarrot, valla vierttiv vuorddet Religiåvnåv.

Ájllek lij riek buorre Rachela lunna. Vaddjujma, ja gårruv gæhttjalam-gápptev. Sasev vierttijma ietjájduhttet, valla ietján lij buorre. Gårruv ietjam alek cool wool tyddjas, ja dálla le dåssju buddit ja sasijt vil goarrot. Galgav Rachela lusi vas gå la giellakonferánssa jåhkåmåhken guovvamánon. Dalloj jáhkáv gergav. Jáhkáv tjáppa gáppte sjaddá.

Buoris!

Båhtiv Jiellevárráj biel’ vidán iektu. Rachel bådij viettjatjit, ja manájma Sonja Rimpi lusi. Vuosedij gápptijt, avijt, sliehpájt ja ietjá duojijt. Riek geldulasj ja buorre suv lunna liehket. Suohtas lij vuojnnet sieradusájt buddasij, listoj j.n. Oadtjuv inspirasjåvnåv.
Gåvvijiv ålov ja dálla le mujna gåvå gå galgav prosjevtav tjállegoahtet. Buorre!

Dálla lav Rachela vega lunna. Måj galggin mönsterav stiellit muv gápptáj, ja de goarrogoahtet. Jáhkáv ja doajvov riek buorre sjaddá J

Buorre ådåjahke!

De lav Gierunij vas jåvsådam, ja skåvllå l álggám. Lav juo skåvlås 3 vahko ierijt læhkám. Ruvva le mannam.

Ájgge l imálasj. Muhttijn, ienemusát gå soaptso ja suohtastalá, ájgge ruvva gållå. Dát loahpe lej guhkke, valla dåbdduj oadne. Jáhkáv lav soapptsum ja hávsskudallam ålles javllaloaben.

Javlla le má dakkár ájgge. Galga hávsskudallat ja vuojŋastit, valla le aj ållo dahkat; báhkkut, vattáldagájt oasstet , rádjat, bassat goadev ja ållo biebmojt málestit ja stiellit. Muhttijn, gå Gierunis juosik vuolgáv ja lav ierijt muhtem vahko, sidáv ahte ladnja galggá rájnas liehket gå ruoptus boadáv. Rájav ja dubmajsjnubáv. Valla dá bále ittjiv dumájsjnubá ja rája. Diehttelis lidjiv biktasijt ja lihtijt bassam.
Gå ruoptus båhtiv åvdep bierjjedagá biedjiv væskojt ja påvsåjt guolbbáj, sabegijt páhkkijiv begas. Ittjiv visjá páhkkit bajás divna stuorvæskos, valla vierttijiv má toalettvæskov ja mobilláddárav iehkedappot. Lávvodak bådij. Smarediv avtsen. Galgajma slálomdieváj tjerastittjat bielnup’tijmav åvddål gå Tour de Ski álgij, ja vierttijiv ålggobåvsåjt ja hullobåvsåjt háhppelit åhtsåt væsko sinna. Håjggiv divna ietjá biktasijt guolbbáj, soffáj ja ståvllåj, ja hæhkkat ålles ladnja vuojnnuj dagu lij bombidum.
Dieván lij riek buorre. Ållo dimes muohta lidjin boahtám ja lej harmmat suohtas tjerastit. Tour de Ski’a ij lim degu jáhkkiv. Valla suohtas lej ahte Hellner nav buoragit tjuojgaj. Suddo gå nievrebuv Northugajn manáj.

Iv asta tjállet ienebuv dálla. Per Mathis le boahtemin ja mån lav gasskabiejvijt málestam. Iehkedis galggin rádna lusi ja soajttá fæsstaj maŋŋedæppon

Buorre ájllek gájkajda!.